27. júlí er runninn upp...

og fésbókarvinir og bloggarar keppast við að minna á spádómana fyrir þennan merkisdag. Jarðskjálfti og/eða eldgos... ???

Í nýjasta tölublaði Vikunnar er viðtal við konu sem ekki aðeins nefnir dagsetningu heldur tímasetningu líka. Hún segist hafa séð skjálfta fyrir áður og jafnvel varað við þeim. Athyglisvert og skemmtilegt viðtal en... hvað nú ef enginn skjálfti kemur og ekkert gos...og bara ekkert?? Þá er ég ansi hrædd um að einu skjálftarnir verði aulahrollar sem hríslast um þá sem á trúðu.

EN HVAÐ EF spáin rætist nú og jörðin tekur að skjálfa??? Við gætum þá heldur betur nýtt okkur þennan hæfileikaríka Íslending. Leitað svara við ýmsum spurningingum sem gætu hjálpað þeirri þurfandi þjóð sem sem hér kúrir í kreppuástandi. Spádómar gætu jafnvel orðið næsta útflutningsvaran okkar og skapað þannig betri gjaldeyrisstöðu.

Ja, ég spái því allavega að sólin komi upp í fyrramálið og setjist annað kvöld en hvort við munum hristast eitthvað eða skjálfa áður en nýr dagur rís...kannski maður færi kristalinn á öruggan stað

Ljósmyndasýningin Allt í Fókus opnaði í Ráðhúsi Reykjavíkur í dag.

Þar sýna 30 félagar mínir í Fókus, 100 ljósmyndir. Sýningin er hin glæsilegasta, en þemað var ALLT, þe. sýnendur höfðu alveg frjálsar hendur með val á myndefni. Fjöldi fólks mætti við opnunina í dag og virtust gestir vera mjög ánægðir með sýninguna.

Ein af myndunum mínum á sýningunni.

Ég hef verið félagsmaður í Fókus sl. tvö ár og er nú að hefja annað starfsárið í sýningarnefnd félagsins. Þar sem um afmælissýningu er að ræða buðum við upp á veglegar veitingar og fékk ég yngri dæturnar til að aðstoða við veitingamálin. Heiðdís mín stóð sig með stakri prýði, skenkti í glös og fyllti á bakka :)

Ég hvet þig til að kíkja við í Tjarnarsalnum við tækifæri og skoða sýninguna, en ég á þar fjórar myndir.

It is true!

Bara gaman að við náðum öðru sætinu. Það var nú ekki mikið spennandi að fylgjast með stigagjöfinni hvað fyrsta sætið varðaði en þeim mun meiri spenna með 2. sætið. Jóhanna stóð sig líka ótrúlega vel og reyndar allir íslensku flytjendurnir. Sviðsmyndin fannst mér flott, nema þessi hoppandi höfrungur og seglskútan - hvað var það eiginlega?

Evróvisjón er þetta sjónvarpsefni sem allir hafa skoðanir á og meira að segja þeir sem lýsa algjöru frati á keppnina tjá sig samt um hana og horfa örugglega margir þó þeir vilji ekki viðurkenna það :) Það eru auðvitað ótal hlutir sem hægt er að fjasa yfir þegar svona keppni er annars vegar en ég er alsæl með hvað okkar litla landi gekk vel í ár. Til hamingju Ísland

 

Ísland í 2. sæti í Moskvu

Heiðdís María fermist borgaralega

Fimmtugsafmæli, ferming, kosningar o.fl.ofl. hefur skautað hjá á fullri ferð síðan ég bloggaði síðast.  Heiðdís María fermdist borgaralega við hátíðlega athöfn sl. sunnudag.  Hún var náttúrulega alveg eins og ævintýraprinsessa þennan dag í glitrandi kjól með fallega hárgreiðslu.

 

 

 

 

 

 

 

 

 

 

 

 

 

 

Hér er mynd af hópnum sem hún fermdist með - síðari athöfnin sunnudaginn 26. aprí. Það voru um 100 börn sem létu ferma sig borgaralega í ár og ég er alveg fullkomlega sátt við þá ákvörðun Heiðdísar að vilja hafa þennan háttinn á. 

 

 

 

 

 

 

 

Við urðum vissulega vör við smá fordóma frá einstaka persónum, en ef satt skal segja var ég sjálf með efasemdir um þessa athöfn fyrir um áratug síðan þegar Guðný var að fermast. Eftir að hafa kynnt mér málin og ma. komist að því að hugtakið ferming á alls ekki bara við í kristinni trú og er í raun eldra heldur en kristindómurinn, hurfu þessar efasemdir eins og dögg fyrir sólu. Krakkarnir sækja tólf vikna námskeið þar sem fram fer fræðsla sem er alveg tær snilld að mínu mati. Ef þú vilt kynna þér þetta nánar er upplýsingar að fá hjá http://sidmennt.is

Það hafði staðið til að halda veisluna heima, en fyrir aðeins örfáum vikum tókum við þá ákvörðun að færa hana út í bæ. Eftir smá leit duttum við niður á þennan fína stað hér í bænum - sveitakrána Áslák! Að morgni fermingardagsins var staðurinn tekinn í extreme makeover. Borð dúkuð, bleikt og fjólublátt skraut út um allt, kerti og blóm og bingó - kráin orðin að kósílegum stað fyrir veisluna sem um 40 manns komu í.

  

Þegar heim var komið tók við myndataka, en fyrst opnaði skvísan gjafirnar. Voða lukkuleg með allt sem kom upp úr pökkunum. 

           

 

 Sl. fimmtudag fór mín svo á fjármálanámskeið sem haldið var í HR fyrir fermingarbörn í boði Íslandsbanka. Hún var nú ekki alveg að "fíla" það að fara "til hvers þarf ég að hlusta á eitthvað fjármálakjaftæði í 3 klukkutíma!!" en þegar ég sótti hana var hún bara hin ánægðasta með kvöldið.

 Hér eru svo að lokum nokkrar myndir sem ég tók föstudagskvöldið fyrir ferminguna. Heiðdís stakk sjálf uppá því að við tækjum útimyndir í fjörunni um sólarlagsbil. Það var skítakuldi þó veðrið væri fallegt, en það er ekki á fyrirsætunni minni að sjá

             

 

 

 

 

 

Nokkrar myndir til að njóta í erli dagsins

 

með bestu óskum um góða vinnuviku framundan :)

 

og svo að lokum ein af systrunum þar sem brugðið var á leik í kjallarastúdíóinu okkar.

 

Unglingurinn Heiðdís María

hefur það alveg "geggjað" gott.

Ég var búin að lofa ykkur "updeiti" kæru vinir, vandamenn og blogglesarar, sem fylgdust með aðgerðinni fyrir ári. Frúin frekar sein í þessu en hér kemur bloggfærsla þar sem ekkert er talað um kreppu eða pólitík

Skvísan er náttúrulega bara flottust (sjá fleiri myndir hér í fyrri færslum) Hún hefur reyndar á sl. ári 2svar fengið slæma verki í eða við festinguna á spönginni - en sem betur fer hefur það jafnað sig fljótlega (með smá hjálp frá ibofeni og panodil). Hún er búin að vera á fullu í leiklist og tekur þátt í öllum íþróttum og sundi. Var eins og dolla í stórsjó á trambolíninu í sumar, svo mikið að mér varð oft nóg um og fann hreinlega til í bringunni við að horfa á hana

Nú er 8. bekkurinn hálfnaður og henni gengur bara vel í skólanum. Nokkuð kærulaus finnst okkur foreldrunum þegar kemur að heimanáminu, en einhvernveginn kemst þetta allt inn í kollinn á henni. Eins og gengur hjá mörgum á þessum aldri er hún mjög upptekin af útlitinu og klæðaburði - litla systir á það til að kalla hana fröken meikdollu þegar verið er að rífast eitthvað.

Nú eru fermingarnar framundan og ákvað Heiðdís fyrir nokkuð löngu að hún vildi ekki fermast í kirkju. Var á tímabili á því að fermast ekkert en afturá móti hefur hún ákveðið að fermast borgaralega og sækir nú fermingarfræðslutíma hjá Siðmennt einu sinni í viku. Alveg brill fræðsla finnst mér - lífsleikni og lífsins gagn og nauðsynjar sem ætti að búa þau vel undir árin framundan. Stóri dagurinn er svo 26. apríl í Háskólabíói. Ég held að hún sé eina stelpan í skólanum sem ekki ætlar að fermast í kirkju. Í fyrstu var hún ákveðin í að sleppa veislu - og fara frekar til Flórída í frí, en sú ferð verður nú að bíða aðeins betri (og gengishagstæðari) tíma. Við stefnum að því að halda smá teiti fyrir okkar nánustu á fermingardaginn.

Heiðdís er náttúrulega komin með facebook síðu eins og þorri þjóðarinnar (og við öll í fjölskyldunni reyndar líka - nema Elín Katrín) Undirrituð á það til að gleyma sér við fésbókarlestur, sem er auðvitað ekkert annað en helv. tímaþjófur. Etv. ein ástæða þess hve ég heimsæki bloggið orðið sjaldan.

Ef þú hefur einhverjar spurningar varðandi svona aðgerð á innfallinni bringu (pectus excavatum) þá er um að gera að hafa samband. Eins bendi ég á bloggfærslur frá nóv-des 2007.

 

Bestu óskir um gleðilegt nýtt ár

Viltu hressa við sálartetrið? Gleyma krepputali og skammdegisdrunga um stund?

Þá mæli ég með því að þú lítir við í Smáralindinni á tímabilinu 21. nóvember til 14. desember og skoðir ljósmyndasýninguna RAUTT Í FÓKUS.

Það eru 32 félagar úr Fókus sem sýna þar myndir og er meginliturinn í þeim öllum rauður. Aðventan er að ganga í garð og rautt er jú alltaf jólalegur litur, en hann er líka hressandi og upplífgandi og við vonum að þessi sýning muni létta öllum lundina, sem á horfa. Myndirnar eru eins ólíkar og þær eru margar þó í þeim öllum sé rauður litur í aðalhlutverki. Góða skemmtun og njóttu vel

Nú árið er liðið...næstum því...frá aðgerðinni

Arg...ég var sko búin að skrifa hér langa færslu með allskyns "updeiti" hvað Heiðdísi Maríu varðar, en þetta blogg var jú upphaflega stofnað vegna aðgerðarinnar sem hún fór í fyrir ári. Haldiði að ég hafi ekki misst allt út áður en ég náði að vista.

Allavega - það gengur bara allt þrusuvel ennþá. Rita aðra færslu fljótlega en þangað til eru hér nokkrar myndir af Heiðdísi Maríu, sem er í rússibana-reisu á leið inn í unglingsárin.

Þessa tók ég fyrir sýningu sem verður í Smáralind fljótlega og kallast Rautt í Fókus. Ætla reyndar ekki að nota hana heldur aðra sem er líka af Heiðdísi.

Hún er svo mikil dramadrottning - ótrúlegar pósur og gaman að nota hana sem módel.

Munum svo að BROS GETUR DIMMU Í DAGSLJÓS BREYTT og ég mæli með því að POLLÝANNA verði skyldulesning í skólum landsins.

Myndir og meira

Það er mikið rætt og ritað um efnahagsmálin á Ísland í dag og furðar engan.  Núna var td. verið að sýna mjög athyglisverðan Kompásþátt á Stöð 2. Ég sleppi því að bæta í þetta haf umræðna hér í bloggheimum, nema hvað ég vil þó segja að ég er ánægð með að fá konur við stýrið í brúnni hjá bönkunum. Við konur höfum nefnilega doktorspróf í því að hreinsa upp draslið og kyssa á bágtið.

Ég fór í gönguferð um helgina í Mosó og tók þá ma. þessa mynd, sem mér finnst vera nokkuð lýsandi fyrir efnahagslífið á Íslandi í dag og ég kalla

ALLT Í FLÆKJU

Staurarnir brotnir, vírarnir beygðir, bognir og í flækju - og svo hlykkjast um þetta allt ryðgaður gaddavír.

En staura má rétta við, greiða úr flækjum og fjarlægja ryð.

Á tímum sem þessum er mikilvægt að muna eftir kærleikanum og knúsast - eins og þessar krúttlegu gulrætur sem komu upp úr garðinum hjá mér um helgina.

Knús frá mér til þín :)